شملہ6نومبر(آئی این ایس انڈیا/ایس او نیوز) کانگریس کے نائب صدر راہول گاندھی نے پیر کو وزیر اعظم نریندر مودی کوکٹہرے میں کھڑا کرتے ہوئے گرجدار آواز میں  کہا کہ مودی کو یڈی یورپا،  مکل رائے اورنارائن رانے کے ہوتے کرپشن پربولنے کاحق نہیں جو کرپشن میں ریکارڈ قائم کرچکے ہیں۔

راہول گاندھی نے  مودی پر نشانہ لگاتے ہوئے کہا کہ  مودی حکومت کی پالیسیوں سے  ہماچل پردیش کی سیاحت اور پھل کی صنعت کو نقصان پہونچا ہے۔انہوں نے ویاپم گھوٹالہ اورمکل رائے جیسے لوگوں کوپارٹی میں شامل کرنے کولے کر اینٹی کرپشن دعووں پرزبردست حملہ کیا۔ راہل گاندھی نے ریاست میں 9 نومبر کو ہونے والے اسمبلی انتخابات سے پہلے سرمور ضلع میں ریلی کے دوران کہاکہ مودی جی نے سیب تاجر، کسانوں اور جو بھی سیاحت کی صنعت میں ہیں، ان کا نقصان کیاہے۔انہوں نے کہاکہ کانگریس چھوٹی صنعتوں کی حمایت کرتی ہے، ہم جی ایس ٹی اورسروس ٹیکس (جی ایس ایس) کے مخالف نہیں ہیں۔ہم نے صرف یہ کہا کہ حکومت کو اس پر عمل درآمد کرنے سے پہلے ایک تفصیلی مطالعہ کرناچاہئے۔

راہل گاندھی نے کہاکہ  حکومت نے ہماری ایک نہیں سنی۔ اب اس فیصلے سے تمام لوگ مصائب سے دو چارہیں۔جب ہم2019 میں اقتدار میں آئیں گے، ہم لوگ جی ایس ٹی کو لوگوں کے لئے آسان بنائیں گے۔ہماچل میں اپنی پہلی انتخابی ریلی میں انہوں نے کہا کہ مودی اترپردیش اسمبلی انتخابات جیتنا چاہتے تھے اور یہی وجہ تھی جس کے لئے انہوں نے لوگوں کی پریشانیوں کے قطع نظر 8 نومبر 2016 کو نوٹ بندی کااعلان کیا۔

انہوں نے کہا کہ روزگار اب بھی ایک بڑا مسئلہ ہے لیکن نریندر مودی حکومت نوجوانوں کو روزگار فراہم کرنے میں ناکام رہی ہے۔کانگریس نائب صدر نے کہاکہ 2014 میں لوک سبھا انتخابات سے پہلے انتخابی ریلیوں میں مودی نے ہر سال 2 کروڑ روزگار دینے کا وعدہ کیا تھا۔لیکن، ہم کیا دیکھ رہے ہیں کہ وہ صرف بڑے صنعت کاروں کے لیے کام کر رہے ہیں۔چین دو دنوں میں 1 لاکھ روزگار پیدا کرتا ہے لیکن بھارت ایک دن میں صرف 450 کام پیدا کرتاہے۔مجھے اس طرح کے حقائق سے شرم آتی ہے۔گجرات کے بارے میں، انہوں نے کہاکہ گجرات میں، تاجروں نے جی ایس ٹی اور نوٹ بندی کی وجہ سے مسائل پیداہونے کے لیے مودی کوذمہ دارماناہے۔راہل گاندھی نے کہاکہ مودی بدعنوانی سے لڑنے کی بات کرتے ہیں، لیکن انہیں ترنمول رہنما مکل رائے، سابق کانگریسی لیڈر نارائن رانے، کرناٹک کے سابق وزیر اعلی بی ایس یڈی یورپا کوپارٹی میں شامل کرنے میں کوئی مسئلہ کیوں نہیں ہے؟

مدھیہ پردیش میں ویاپم گھوٹالہ ہوا، تقریباََ50 افرادہلاک ہوگئے۔کیا مودی نے اس پر کچھ بولا؟ کیا مودی نے امت شاہ پر ایک بھی لفظ بولا؟۔ آپ کہتے ہیں کہ آپ (مودی) چوکیدار ہیں، لیکن آپ’پارٹنر‘ہیں۔کمیشن کے اعداد و شمار کا حوالہ دیتے ہوئے، انہوں نے کہا، "ہماچل پردیش کا ماڈل گجرات ماڈل سے کہیں زیادہ ہے۔راہل گاندھی نے کہاکہ ہم سخت محنت کرتے ہیں، ہم رات اور دن کام کرتے ہیں، مودی حکومت کی طرح نہیں، جوصرف وعدہ کرتی ہے۔